- შეიძლება ცოდნა იყოს მხიარული?
- რა თქმა უნდა, ეს ხომ ცოდნის მხიარული სამყაროა. აქ სიმღერებით, ანიმაციებითა და ონლაინ-თამაშებით ჩვენ ყველაფერს ვისწავლით და ძალიან მაგრად გავერთობით...

ცოდნა გართობით - ეს იდეა 2006 წლიდან მოსვენებას არ მაძლევს. ამ იდეით შევქმენი საქართველოში პირველი საბავშვო შემეცნებითი-გასართობი პროექტი CODNA.GE, რომელშიც შემეცნებითი ფლეშ თამაშები ვიქტორინის სახით იყო წარმოდგენილი. პროქტი 2007 წლის ეროვნულ-ინტერნეტის გამარჯვებული გახდა ნომინაციაში “საბავშვო რესურსები”. სამწუხაროდ, მაშინ პროექტმა სახელმწიფოს მხრიდან სათანადო მხარდაჭერა ვერ მიიღო. 10 წლის შემდეგ ჩემმა 3 წლის ბიჭმა ირაკლიმ ამ იდეისკენ ისევ დამაბრუნა. ჩემი შვილის მაგალითზე მე ნათლად დავინახე, შემეცნებითი სიმღერები, ანიმაციები და თამაშები რამდენად დადებითად მოქმედებს ბავშვის განვითარებაზე. სამწუხაროდ, ყველა ეს პროდუქტი არაქართული იყო და მაშინ დამებადა იდეა-შექმნილიყო სუფთა ქართული პროექტი, რომელშიც ბავშვები სიმღერებით, ანიმაციებითა და ონლაინ-თამაშებით ისწავლიან ანბანს, რიცხვებს, ფერებს, უფროსის პატივისცემას, ბუნების სიყვარულსა და მრავალ სხვას. დარწმუნებული ვარ, ბავშვი შემეცნების პროცესს თუ პოზიტიური და მისთვის მისაღები ფორმით დაიწყებს, ეს მის შემდგომ თვითგანვითარებისადმი ლტოლვას უფრო გაზრდის, რაც წარმატებული ქვეყნის ფორმირებისთვის ძალიან მნიშვნელოვანია.
ახალ პროექტს სახელად “ცოდნის მხიარული სამყარო” დავარქვი და მასზე ძალიან ბევრი შემიძლია ვისაუბრო; თუმცა, აჯობებს პირველი გადაცემა თავად ნახოთ (იხილეთ ბმული), რომელიც იმ ადამიანების უანგარო ძალისხმევის შედეგად შეიქმნა, ვინც ამ იდეის ირგვლივ გაერთიანდა.
ჩვენს პროექტს დიდი ნდობა გამოუცხადეს სრულიად საქართველოს კათოლიკოს-პატრიარქის ილია II-ის საერთაშორისო საქველმოქმედო ფონდმა (იხილეთ ბმული) და დავითთიანის ფსიქოლოგიურმა ცენტრმა (იხილეთ ბმული), რისთვისაც მათ უღრმესი მადლობა მინდა გადავუხადო!

საქველმოქმედო ორგანიზაცია "ეროვნული ინტერნეტის განვითარების საზოგადოების" პრეზიდენტი ვახტანგ ჯინჯიხაძე